Како водечки национален оператор за електронски комуникации, Македонски Телеком АД-Скопје на своите корисници им нуди широк спектар на врвни телекомуникациски услуги и забавни содржини, и тоа во доменот на фиксната мрежа, широкопојасни услуги и интегрирани решенија, вклучувајќи и телевизија преку интернет протокол (IPTV). Во компаниското продуктно портфолио се услуги базирани на Интернет протокол, пренос на податоци, продажба и изнајмување на опрема и услуги за системска интеграција.

Обезбедувајќи иновативни услуги со врвен квалитет и ефикасност во сите области на делување, компанијата има клучно место и улога во осовременувањето и унапредувањето на телекомуникацискиот пазар во Република Македонија. Со развивањето на иновативни производи и услуги, компанијата го промовира личното и социјалното вмрежување меѓу луѓето во македонското општество, со што станува главен национален носител на изградбата на информатичкото општество во државата.

Дел од меѓународната групација Дојче Телеком

Од 2001 година, компанијата како член на групацијата Маѓар Телеком, станува дел од меѓународната групација Дојче Телеком. Со новата прилагодена бренд структура и постојано во чекор со најновите светски достигнувања од доменот на електронските комуникации, компанијата во континуитет е фокусирана на пресретнување на барањата и потребите на корисниците во модерното време, притоа секогаш користејќи ги најдобрите начини на работење на групацијата Дојче Телеком со цел максимални придобивки за корисниците.
Континуираниот развој на комуникациската мрежа на територијата на Република Македонија и воведување на нови телекомуникациски услуги и решенија е главниот фокус на компанијата. Во таа насока Македоснки Телеком ќе се движи и во 2009 година. Oд суштинска важност е имплементацијата на проектот „Оптика до домот“ што ќе овозможи изградба на значително побрза телекомуникациска мрежа, со брзини до 100 Mbps достапни во секој дом.

Издадени акции
- обични: 95.838.780
- приоритетни: 0
Вкупно:95.838.780

Во известувањето на Македонски Телеком АД – Скопје се вели дека дивидендата за 2009 година е утврдена во вкупен бруто износ од 6.470.029.239,00 денари, односно бруто износ од 75,01 денари по акција (заокружено на две децимали), во кој е вклучен данокот на добивка, персонален данок на доход и данокот по задршка, каде што е применливо на денот на исплата на дивидендата.

Право на дивиденда имаат сите акционери кои ќе бидат евидентирани во Книгата на акционери на Македонски Телеком АД – Скопје на ден 09.07.2010 година, додека пак последен ден на тргување со право на дивиденда за 2009 година е 06.07.2010 година, се вели во известувањето на компанијата.

Исплатата на дивидендата ќе се изврши во периодот од 12.07.2010 до 25.07.2010 година.