Компаниите не го разбираат Хасап системот

Маслинки кои секој може да ги допре, а да не купи од нив. Свежа риба, наместо во фрижидер, поставена во картонска кутија пред продавница. Голо сирење подлежно на бактерии, но и на муви.
Продавачите без ракавици и работна облека. Ваква слика затекнаа инспекторите од Дирекцијата за храна на зелениот пазар во Скопје, која ни од далеку не е блиска на принципите што ги бара ХАСАП системот.
Инспекторите имаат задача во наредните четири месеци да им укажат и да ги предупредат операторите со храна во врска со тоа што треба да го сторат за да имаат добра производна и хигиенска пракса. Дел од тезгаџиите добија упатства дека мора да биде наведено од каде е производот, бидејќи ни тие, а ни потрошувачот, нема да бидат сигурни во неговата безбедност.

- Од каде ви се рибите? Знаете ли дека треба да бидат во фрижидер? Исто така, мора да имате на писмено од каде се. Маслинки вака не можат да се продаваат. Може да се контаминираат, а вие немате ракавици. Во иднина може да ги продавате само запакувани - им кажа на тезгаџиите Божин Петрески од Дирекцијата за храна.
Министерот за здравство изјави дека, по први мај, производителите кои нема да ги имплементираат принципите од ХАСАП системот ќе заработат казни согласно Законот за безбедност на храната.
- Обврската за Хасап не е од вчера и тие знаат за тоа со години. Ја зедовме предвид и глобалната економска криза. Ова е тежок процес, кој можеби во првата фаза ќе предизвикува проблеми и незадоволство кај граѓаните, меѓутоа на крајот ќе имаме производители кои ќе имаат квалитетна и здрава храна и која ќе биде добра и за извоз, а и ќе го гарантира здравјето на граѓаните на Македонија - изјави Бујар Османи, министер за здравство.
Што се однесува до приватните консултантски куќи кои ги советувале производителите околу Хасап системот, министерот за здравство изјави дека тие не се авторизирани од министерството. Дирекцијата за храна била надлежна за акредитирање на производителите.
(ТВ Сител)